【日產袋鼠皮速度型波Boot： Morelia Neo 2 MIJ 實測】
.
Mizuno波boot主打系列就有Morelia, Morelia Neo同Rebula。而今次，阿靴就同大家講講當中嘅其中一對: Morelia Neo 2，Made in Japan嘅選擇。話說Morelia Neo於2011出產，佢係由Morelia衍生嘅波boot，佢將傳統嘅Morelia改造，換成較現代嘅設計，當中最明顯嘅係鞋型變得更輕更修腳，期望製作出一對速度型嘅袋鼠皮波boot。Morelia Neo 亦於2016年升級至第二代，當中作出咗少量調整。作為Mizuno嘅其中一對主打波boot，今次阿靴再次就會同大家實測，認真講講Morelia Neo 2 MIJ嘅發揮同特性。
.
Morelia Neo 2 鞋頭位置用上軟熟袋鼠皮，㩒落去嘅質感柔軟，不過質料唔算厚。鞋身就用上較薄嘅超纖合成皮，目的係減輕波boot嘅整體重量。Morelia Neo 2鞋舌位置質料同樣薄及柔軟，加上鞋身位置傾向修腳，令波boot更為貼腳。鞋籠位置Morelia Neo 2 用上麂皮，加上鞋帶質料較粗糙，期望加強波boot嘅整體lockdown。至於鞋釘上，Morelia Neo 2用上較經典嘅12粒圓釘，加上中間一粒加強衝刺力嘅特別釘粒。
.
於鞋型上，阿靴為中腳形，Morelia Neo 2可以話非常合適。阿靴亦用Morelia Neo 2踢過數場比賽。
.
阿靴最滿意嘅係Morelia Neo 2嘅舒適度及包腳質感，鞋內位置經特別設計，一著上腳時已經感受到波Boot對腳底嘅充裕支撐，特別於於內側位置微微突起，令足弓位置變得舒適。此外，Morelia Neo 2鞋頭位置用上袋鼠皮固然舒適，但鞋後身的超纖合成皮也不會太硬，喱點令波Boot更輕巧外，亦唔會大量減低到波Boot的觸球質感。除此之外，較修腳嘅設計，加上鞋踭及鞋舌內層位置用上麂皮質料，Morelia Neo 2嘅包腳感非常強，亦令Lockdown非常充裕，正正適合一啲又喜歡袋鼠皮傳統質感，又喜歡輕巧靈活嘅波友。
.
Morelia Neo 2帶來嘅傳控質感屬於理想，鞋頭位置袋鼠皮質料軟熟，帶來非常優質嘅控球質感，加上鞋內外側凹凸橫紋嘅Runbird標誌可以少量增強控球質感，長短距離嘅傳送均可以較輕鬆控下。短傳上發揮屬於中上，畢竟Morelia Neo 2只有鞋頭位置為袋鼠皮，這點相對全袋鼠皮波Boot的球感會略為欠奉。至於長傳上，Morelia Neo 2袋鼠皮較薄及貼，力量層面屬於充裕，帶來不錯嘅傳統袋鼠皮球感。
.
Morelia Neo 2於盤扭層面屬有驚喜，畢竟於以往嘅測試，袋鼠皮Boot於這一項會較弱。雖然Morelia Neo 2屬於袋鼠皮波Boot，但佢嘅重量則控制得較輕巧嘅水平，加上較修腳嘅關係，靈活層面可以話於Mizuno袋鼠皮Boot上數一數二。不過當然，阿靴認為靈活度層面上，用上Knit質料嘅波Boot如Mercurial及X仍然優勝過Morelia Neo 2，畢竟Knit質料嘅整體質感會更加薄及貼腳。
.
至於鞋釘上，Mizuno經典嘅12粒圓釘，喱種鞋釘適合香港嘅真草場，以及中至高質素嘅仿真草，鞋釘的抓地力則屬於普通，呢一點係阿靴覺得Morelia Neo 2較失色嘅位置，畢竟Morelia Neo 2 嘅主打係速度。
.
至於射門上，Morelia Neo 2 鞋型非常貼合阿靴。包腳度充裕，加上袋鼠皮較薄，腳面射門球道會較穩定，射門姿勢做得好，亦能夠做到較漂嘅射門。至於腳內檔射門上，阿靴回應為發揮相當理想，畢竟Morelia Neo 2 嘅袋鼠皮於摩擦力及力量層面上拿捏得相當平衡，腳內檔嘅燙射會較為急勁，加上球感理想，可以較輕鬆射往目標。
.
整體嚟講，阿靴相當滿意Morelia Neo 2 嘅發揮，主要原因在於腳型合適，以及阿靴較喜歡具速度感嘅波Boot。至於鞋型上，Morelia Neo 2較一般Mizuno波Boot修腳，中腳型嘅波友會非常合適。至於Size上，阿靴平時着開US8，Morelia Neo 2 揀返US8就會非常合適。
.
Morelia Neo 2 MIJ 實測報告:
盤球：●●●●
控球：●●●●◐
短傳：●●●●
長傳：●●●●
射門：●●●●◐
舒適：●●●●◐
保護：●●●●
.
再次感謝 Hanstti Soccer 提供嘅波Boot
.
----------------------------------------------------
【屎波裝備多Instagram】Follow: instagram.com/hkfootballreview
【波Boot實測】蜘蛛俠Nemeziz 19+ FG: https://youtu.be/NxJcr40CNWI
【波Boot實測】白飯魚: https://youtu.be/-dbvs0_YgiY
Search